
TIRANË- Një aktivist ka deklaruar se vijimi i tubimeve të përditshme ka rritur presionin ndaj kryeministrit Edi Rama, i cili po përpiqet të bindë qytetarët se nuk do të largohet nga posti. Duke folur gjatë protestës së 61-të kundër qeverisë, ai theksoi se daljet e shpeshta publike të kryeministrit tregojnë një situatë paniku përballë protestës që vijon prej më shumë se dy muajsh, ndërsa e cilësoi kreun e qeverisë “si burracak”.
"Sa më shumë kalojnë ditët, aq më i madh është presioni ndaj Edi Ramës dhe, po e keni vënë re, sa më shumë ditë kalojnë, Edi Rama aq më shumë del në TV për të na mbushur mendjen se nuk do të largohet. Ai duket që është në panik, si ata burracakët e frikësuar që, në momentet e panikut dhe frikës, duan të tregojnë trimëri. A e mbani mend, në ditët e para të protestës, Edi Ramën, i cili nuk na merrte seriozisht dhe thoshte se është hera e parë që ai ka menduar të japë dorëheqjen, sepse kjo protestë dhe këta qytetarë e kanë bërë të reflektojë? Por, pikërisht me kalimin e ditëve, ai e ka kuptuar se shqiptarët nuk tërhiqen pa u dorëhequr Edi Rama.
Dhe pikërisht tani që e ka kuptuar se kjo protestë nuk tërhiqet pa u dorëhequr Edi Rama, mundohet çdo ditë të tregohet si i fortë. Argumenti i tij kryesor është se ka një kontratë me 800 mijë qytetarë, por i kujtojmë se kontrata, ndër të tjera, ka edhe dy paragrafë, të drejtat dhe detyrimet. Vitin e kaluar të kemi dhënë të drejtën të qeverisësh, por ti nuk i ke plotësuar detyrimet. Ti ke shkelur çdo nen të kontratës, të paragrafit të detyrimeve, dhe duke qenë se nuk ke përmbushur detyrimet e tua si kryeministër, ne sot të kërkojmë dorëheqjen. Sot, duke u munduar të fshehë panikun që e ka kapluar, tha se himni i kësaj proteste i përket atij “Rama, jep dorëheqjen”. Ne e dimë që ky himn të ka tmerruar dhe po përpiqesh të fshehësh panikun. Sepse për ty ka filluar numërimi mbrapsht. Dhe nëse nuk tërhiqesh, ne do të kujdesemi me çdo formë dhe mënyrë që të mos jesh më kryeministri i shqiptarëve," tha aktivisti./Dosja.al