Berisha: Do të ngremë një agjenci kombëtare që do të merret me pronat e krimit dhe pronat e paligjshme të politikan&e...
Aktualitet
Dënohet me 10 vite burg ‘skifteri’ shqiptar që terrorizoi Anglinë/ Gjurmët e gjakut zbuluan 30-vjeçarin, momenti kur vihet në pranga (VIDEO)
Sipas mediave të huaja, policia gjeti gjurmë gjaku në të dyja banesat e vjedhura dhe kreu ekzaminime mjeko-ligjore.
22 July 2026, 10:24Nga E. D
ANGLI- Një hajdut serial me origjinë shqiptare që kishte në shënjestër banesat në Berkshire, si pjesë e një vale të madhe vjedhjesh në jug të Anglisë, është dënuar me 10 vjet burg. Gledis Uka, 30 vjeç, akuzohet për një seri vjedhjesh në Berkshire, si edhe në zona të tjera të Buckinghamshire, Bristol, Essex, Londër, Suffolk, Surrey dhe Kent.
Sipas mediave të huaja, policia gjeti gjurmë gjaku në të dyja banesat e vjedhura dhe kreu ekzaminime mjeko-ligjore. Gjatë dy viteve në vijim, u raportuan vjedhje të tjera me karakteristika të ngjashme në Edenbridge dhe Sevenoaks, ku gjithashtu u gjet gjak në disa nga vendngjarjet.
Provat e mbledhura nga këto raste i ndihmuan hetuesit të lidhnin vjedhjet me njëra-tjetrën dhe të identifikonin Gledis Ukën, si autorin e dyshuar. Detektivët zbuluan gjithashtu atë që e përshkruan si një model të qartë kriminal. Uka udhëtonte në Angli gjatë muajve të dimrit për të kryer vjedhje dhe më pas largohej përsëri nga vendi.
Më 30 janar 2026, Uka, pa adresë të përhershme, u arrestua nga policia e Kentit në Essex. Një ditë më vonë, ai u akuzua për 33 vepra penale që lidhen me vjedhje në të gjithë jugun e Anglisë, përfshirë edhe ato të kryera në Buckinghamshire.
Më vonë, Uka pranoi fajësinë për 19 vepra penale, një marrëveshje që u pranua nga prokuroria. Dy akuza të tjera u morën në konsideratë gjatë dënimit, ndërsa akuzat e mbetura do të mbeten në dosje. Më 14 korrik, në Gjykatën e Kurorës në Maidstone, ai u dënua me 10 vjet burg.
"Ky ishte një hetim kompleks që tregon këmbënguljen dhe përkushtimin e oficerëve për më shumë se dy vjet. Për shkak të intervaleve kohore mes vjedhjeve dhe vendeve të ndryshme ku ato ndodhën, ishte një proces i hollësishëm për t'i lidhur zyrtarisht përmes provave mjeko-ligjore dhe për t'i atribuuar ato një personi të vetëm, Ukës. Pasi u identifikua, pati vështirësi të tjera për ta lokalizuar, pasi besohej se ai kryente këtë seri vjedhjesh në Angli vetëm gjatë muajve të dimrit.
Uka nuk tregoi asnjë pendesë për viktimat e tij. Ai hynte me forcë në banesa, linte rrëmujë dhe vidhte edhe sende me vlerë sentimentale. Në një nga rastet, viktima ndodhej brenda shtëpisë kur ai hyri me forcë, gjë që duhet të ketë qenë një përvojë tmerruese për të. Jam e kënaqur që ai tani ndodhet pas hekurave dhe që puna shumëvjeçare ka dhënë rezultat”, tha detektivja Celia King./Dosja.al