
TIRANË- Prokurori i SPAK, Altin Dumani, pas seancës së sotme ndaj Erion Veliajt, ku avokatët munguan për shkak të bojkotit, kërkoi që gjyqi të vijojë pa avokatë. Dumani ka deklaruar se gjatë seancës se Gjykata mund të shqyrtojë që të konsiderojë mundësinë që sjellja e të pandehurve dhe avokatëve të konsiderohet si heqje dorë nga e drejta e mbrojtjes. Sipas Dumanit, ekziston edhe një precedent nga Gjykata e Apelit, ku një çështje është shqyrtuar pa praninë e avokatëve.
“Mbrojtja është një e drejtë. Duke parë sjelljen e të pandehurve dhe avokatëve, vlerësojmë se Gjykata duhet të shqyrtojë mundësinë që ta konsiderojë sjelljen e tyre si heqje dorë nga kjo e drejtë dhe të vijojë gjyqin pa avokat. Gjykata e Apelit e ka një precedent të tillë, ku ka shqyrtuar çështje pa avokat”, mësohet të ketë thënë Dumani.
Nga ana tjetër, GJKKO ka thënë se do të shprehet në një moment të dytë për kërkesën e SPAK, ndërsa seanca e radhës për Erion Veliajn është caktuar për më 27 tetor. Gjykata vendosi që në këtë seancë të thirren avokatë nga shërbimi i ndihmës juridike falas pranë Ministrisë së Drejtësisë.
Prej 7 shtatorit, avokatët kanë bojkotuar proceset në Gjykatën e Posaçme, duke kundërshtuar rregulloren e re që ndalon mbajtjen dhe përdorimin e celularëve në sallat e gjykimit./Dosja.al