Berisha: Do të ngremë një agjenci kombëtare që do të merret me pronat e krimit dhe pronat e paligjshme të politikan&e...
Aktualitet
Iu ndalua hyrja në Shqipëri/ Kush janë dy shqiptarët e Maqedonisë që u shpallën “non grata”
Ndërsa Bela e ka lidhur dëbimin e tij me qëndrimet e ashpra kritike ndaj qeverisë shqiptare, rasti i Halimit lidhet me profilin e tij të gjatë dhe polemikat rreth aktivitetit fetar.
4 August 2026, 19:50Nga D.S
Valon Bela dhe imamin Bekir Halimi
TIRANË- Vendimi i Ministrisë së Brendshme për të shpallur "non grata" analistin Valon Bela dhe imamin Bekir Halimi ka ngjallur debate të forta në rajon. Ndërsa Bela e ka lidhur dëbimin e tij me qëndrimet e ashpra kritike ndaj qeverisë shqiptare, rasti i Halimit lidhet me profilin e tij të gjatë dhe polemikat rreth aktivitetit fetar. Këto masa të fundit dëshmojnë qasjen e ashpër të autoriteteve për të kufizuar hyrjen e figurave publike të huaja nën pretekstin e mbrojtjes së sigurisë kombëtare.
Valon Bela është analist politik dhe ish-funksionar publik në Maqedoninë e Veriut, i cili ka shërbyer si shef kabineti në Ministrinë e Shëndetësisë dhe drejtor ekonomik në Klinikën Gjinekologjike në Shkup. I njohur si ish-pjesëmarrës në tre konflikte armatosura dhe si viktimë e një atentati me armë zjarri në Shkup në vitin 2018, Bela prej vitesh ka mbajtur një profil publik aktiv dhe kritik ndaj zhvillimeve politike rajonale.
Valon Bela
Shpallja e tij non grata nga Ministria e Brendshme e Shqipërisë, shoqëruar me urdhër dëbimi në bazë të Ligjit për të Huajt, erdhi pas kritikave të tij të ashpra ndaj kryeministrit Edi Rama dhe pjesëmarrjes në protesta. Në reagimin e tij publik, Bela e ka kundërshtuar vendimin duke e cilësuar atë politik dhe duke pretenduar se qeveria shqiptare po vepron në sinkron me Serbinë, ku ai gjithashtu pretendon se ka një ndalesë hyrjeje.
Bekir Halimi është një imam nga Shkupi dhe prej më shumë se një dekade figurë e njohur e debatit fetar e identitar në Maqedoninë e Veriut. Ai ka vepruar kryesisht jashtë kuadrit zyrtar pasi u përjashtua në vitin 2016 nga Bashkësia Fetare Islame (BFI) pas konflikteve me drejtuesit e saj, zhvillime këto që janë dokumentuar edhe në raportet e Departamentit Amerikan të Shtetit për Lirinë Fetare.
Bekir Halimi
Emri i tij është përmendur gjithashtu në studime dhe raportime mediatike mbi aktivitetet fetare në rajon, përfshirë hetimet e vitit 2010 mbi shoqatën bamirëse “Bamsiera” për menaxhimin e fondeve, ndonëse ndaj tij nuk ka pasur akuza penale apo arrestime. Përfshirja e tij në listën e personave të padëshiruar nga Shqipëria erdhi me arsyetimin e mbrojtjes së sigurisë kombëtare dhe rendit publik, pa u shoqëruar me provat zyrtare nga autoritetet./Dosja.al