11 November 2026, 15:33
Nga E. D
Erion Veliaj
TIRANË- Kryebashkiaku, Erion Veliaj i është drejtuar zyrtarisht kreut të Grupit Parlamentar të PS-së, Taulant Balla, me një kërkesë për ngritjen e një komisioni hetimor parlamentar lidhur me ndërhyrjet dhe kërcënimet që pretendon se janë ushtruar ndaj tij nga kryeministri Edi Rama, nëpërmjet Ministrit të Drejtësisë, Toni Gogu.
Në deklaratën e tij, Veliaj kërkon që Kuvendi të hetojë nëse transferimi i tij nga burgu i Durrësit në Fier dhe kushtet e paraburgimit janë përdorur si mjete presioni për ta detyruar të pranojë organizimin e protestave në Tiranë dhe të japë dorëheqjen nga mandati i kryetarit të Bashkisë së Tiranës.
Veliaj shprehet se është i gatshëm të dëshmojë nën betim përpara Kuvendit, të përballet me Ministrin e Drejtësisë, Toni Gogu, si dhe të paraqesë çdo provë që disponon. Ai kërkon gjithashtu që edhe kryeministri Edi Rama t'i nënshtrohet të njëjtit standard llogaridhënieje. Sipas Veliajt, kërkesa i është drejtuar shumicës parlamentare socialiste me argumentin se kontrolli kushtetues mbi qeverinë nuk duhet të ndikohet nga përkatësia politike e personave ndaj të cilëve kërkohet llogaridhënie.
Po ashtu, kryebashkiaku bën me dije se ka vënë në dijeni edhe Kongresin e Autoriteteve Lokale dhe Rajonale të Këshillit të Evropës, si dhe trupin diplomatik të akredituar në Shqipëri. Ai thotë se ka kërkuar gjithashtu ruajtjen e menjëhershme të provave dokumentare dhe audiovizive që mund të lidhen me pretendimet e tij. Në fund të deklaratës, Veliaj thekson se nuk kërkon që Kuvendi t'i marrë si të mirëqena pretendimet e tij, por t'i hetojë ato.
Deklarata e Veliajt:
Sot i jam drejtuar zyrtarisht Kryetarit të Grupit Parlamentar Socialist, Taulant Balla, me kërkesën për inicimin e ngritjes së një komisioni hetimor parlamentar mbi ndërhyrjet dhe kërcënimet që kam deklaruar se janë ushtruar ndaj meje nga Kryeministri Edi Rama, nëpërmjet Ministrit të Drejtësisë. Kam kërkuar të hetohet nëse transferimi im nga Durrësi në Fier dhe kushtet e paraburgimit janë përdorur si instrumente presioni për të më detyruar të pranoj organizimin e protestave në Tiranë dhe të jap dorëheqjen nga mandati që më kanë besuar qytetarët e kryeqytetit. Jam i gatshëm të dëshmoj nën betim përpara Kuvendit, sipas ligjit, të ballafaqohem me Ministrin e Drejtësisë, Toni Gogu, dhe të paraqes çdo provë që disponoj.
Kam kërkuar gjithashtu që Kryeministri Edi Rama t’i nënshtrohet të njëjtit standard llogaridhënieje.
Kërkesën ia kam drejtuar shumicës parlamentare të partisë sime, sepse kontrolli kushtetues mbi qeverinë nuk mund të kushtëzohet nga përkatësia politike e atyre që duhet të japin llogari. Kam vënë në dijeni edhe Kongresin e Autoriteteve Lokale dhe Rajonale të Këshillit të Evropës dhe trupin diplomatik të akredituar në Shqipëri, si dhe kam kërkuar ruajtjen e menjëhershme të provave dokumentare dhe audiovizive. Nuk kërkoj që Kuvendi t’i marrë si të mirëqena deklarimet e mia. Kërkoj që t’i hetojë. Mandati i një kryetari bashkie buron nga vota e qytetarëve dhe vota e qytetarëve nuk mund të bëhet objekt shantazhi politik.
Erion Veliaj
Kryetar i Bashkisë Tiranë
11 nëntor 2026See less
Pasditen e 28 tetorit Veliaj u transferua papritur nga paraburgimi i Durrësit në qelitë e burgut të Fierit me vendim të Drejtorisë së Përgjithshme të Burgjeve. Transferimi i tij ka shkaktuar reagime dhe polemika të shumta, si dhe një "luftë" brenda socialistëve. Transferimin nga qelia e Durrësit në Fier, Veliaj e cilësoi si një “rrëmbim policor” pasi nuk ishte njohur me aktin që urdhëronte transferimin dhe arsyet e lidhura me këtë vendim. Nga ana tjetër, Drejtoria e Burgjeve tha se urdhri i transferimit është firmosur sipas procedurave, por dokumenti është klasifikuar “sekret shtetëror”, ndaj nuk mund të bëhet publik jashtë kushteve të parashikuara në ligj.
Transferimi i Veliajt ka sjellë një "luftë" mes tij dhe Kryeministrit Edi Rama. E gjitha u bë publike, pasi Ministri i Drejtësisë, Toni Gogu, pranoi se ka zhvilluar takim me Veliajn në burgun e Fierit në mënyrë të fshehtë, por mohoi që t'i ketë përcjellë mesazhe kërcënuese nga kryeministri Edi Rama, të cilat ishin raportuar në media. Gogu tha se takimi është zhvilluar të premten, në kuadër të përgjegjësive të tij si ministër i Drejtësisë. Sipas tij, vizita kishte për qëllim njohjen me kushtet e trajtimit të Veliajt dhe dëgjimin e ankesave të ngritura publikisht nga avokati i tij, Plarent Ndreca. Por Veliaj tregoi një anë tjetër të takimit, duke konfirmuar mesazhet kërcënuese që ka marrë dy ditë më parë nga Kryeministri Edi Rama nëpëmjet Ministrit Toni Gogu.
Sipas versionit të Veliajt, gjatë takimit të zhvilluar të premten në orën 22:30, Gogu i ka komunikuar disa kërkesa që lidhen me pranimin e përfshirjes në protestat, heqjen dorë nga drejtimi i Bashkisë së Tiranës dhe delegimin te Arbër Hajdari, si dhe ndërprerjen e këshillimit me avokatin Plarent Ndreca. Në letrën e publikuar nga kryebashkiaku, thuhet gjithashtu se mospranimi i këtyre kërkesave mund të sillte rëndimin e pozitës së tij ligjore dhe përballjen me akuza të tjera. Po ashtu, Veliaj ka mohuar kategorikisht lidhjen me protestat dhe i ka kërkuar kryeministrit të paraqesë prova për këto pretendime. Ai ka theksuar se nuk do të heqë dorë nga dinjiteti i tij, pavarësisht situatës në të cilën ndodhet./Dosja.al
Erion Veliaj
Politike
11 November 2026, 15:31
E. D
KOSOVË- Dritat në shtëpinë e Qemajl Fetahut dhe bashkëshortes së tij, Shpresës, një herë në javë nd...
Politike
11 November 2026, 14:39
E.d
Ina Zhupa
TIRANA- Kryetarja e Komisionit për Kulturën, Turizmin dhe Diasporën, Ina Zhupa, gjatë mbledhjes së komisionit të zhvi...
Politike
11 November 2026, 14:28
E.d
Foto nga komisioni për Nismat Qytetare
TIRANA- Projektbuxheti për vitin 2027 parashikon 735.5 milionë lekë për Kontrollin e Lar...
Politike
11 November 2026, 14:23
G.M
Ilirjan Celibashi
TIRANË- Zgjedhjet vendore të 9 majit 2027 parashikohet të kushtojnë rreth 2.5 miliardë lekë nga buxheti i shte...
Politike
11 November 2026, 14:06
Klevis Balliu
TIRANË- Deputeti i Partisë Demokratike, Klevis Balliu ka hedhur akuza të reja lidhur me aferën e AKSHI-t, duke preten...
Politike
11 November 2026, 14:05
G.M
Nikola Kedhi
TIRANË- Nënkryetari i Partisë Demokratike, Nikola Kedhi, ka reaguar për situatën e ujit të pijshëm në Vlo...
Politike
11 November 2026, 13:08
E.d
Pamje
DUBLIN- Protestat e qytetarëve shqiptarë e kanë ndjekur kryeministrin Rama edhe në Dublin, ndërsa ndodhet aty në kuadë...
Politike
11 November 2026, 12:42
E.d
Marjana Koçeku
TIRANA- Deputetja e pavarur, Marjana Koçeku është përplasur në rrjetet sociale me Vladimir Štim...
Politike
11 November 2026, 12:04
E.d
Gazment Bardhi
TIRANA- Kreu i Grupit Parlamentar të PD-së, Gazment Bardhi ka reaguar lidhur me debatet për Reformën Zgjedhore, duke hedhur...
Politike
11 November 2026, 11:57
E.d
Taulant Balla
TIRANA- Kreu i Grupit Parlamentar të Partisë Socialiste, Taulant Balla ka deklaruar ditën e sotme se Partia Demokratike nuk...