"Të relaksohemi"/ Mickoski pyetet për incidentin e himnit në Pustec: Nuk e kemi ndjekur aktivitetin deri në fund, por ne i vlerë...
Politike
Protestat e studentëve/ Rama i sulmon: Dhunues urban, shpërthejnë në eufori kundër Policisë së Shtetit(VIDEO)
Më tej, lideri i qeverisë u ndal edhe tek veprimet e protestuesve duke thënë se disa prej pjesëmarrësve kanë ushtruar presion dhe kanë goditur drejtues automjetesh.
28 October 2026, 13:25Nga E.d
Edi Rama
TIRANA- Kryeministri Edi Rama ka sulmuar sërish protestuesit studentë, të cilët prej 16 ditësh po protestojnë kundër tij. Në një mesazh për mediat, Rama u shpreh se qytetarët që nuk janë pjesë e protestës nuk duhet të ndihen të frikësuar apo të detyruar të ndryshojnë rutinën e tyre për shkak të tubimeve.
Më tej, lideri i qeverisë u ndal edhe tek veprimet e protestuesve duke thënë se disa prej pjesëmarrësve kanë ushtruar presion dhe kanë goditur drejtues automjetesh. Në fund, ai pretendoi se në protestë janë bashkuar individë dhe grupe me qëllime të ndryshme, të cilat nuk kanë lidhje me njëra-tjetrën.
“A është e mundur të pranohet si normalitet, agresioni i një turme, e cila, në emër të rinisë, studentëve, ardhmërisë, kërkon të na imponohet të gjithëve, jo thjesht duke thyer xhamat e Ministrisë së Arsimit dhe dyqaneve pranë saj, po duke thyer çdo normë të bashkëjetesës mes njerëzish të të njëjtit qytet? Dhe kur them të gjithë nuk kam parasysh veten, qeverinë, shumicën parlamentare. Jo, kam parasysh të gjithë, pa përjashtim të gjithë ata, që nuk janë pjesë e këtij agresioni dhe që përjetojnë frikë, pasiguri, pështjellim nga kjo turmë dhunuesish urbanë dhe përndjekësish online.
Patjetër që kam parasysh edhe ata që nuk e kanë votuar këtë qeveri, nuk më duan mua kryeministër, nuk janë dakord me asgjë që ne bëjmë, po ama duan të lëvizin lirisht në këtë qytet, duan të çojnë fëmijët në shkollë, të shkojnë në punë, të mbajnë hapur dyqanet deri në darkë, të shëtisin në mbrëmje të patrazuar. Shkurt, duan të jetojnë pa qenë të detyruar të ndryshojnë rendin e ditës së tyre, për shkak të një turme agresive ndaj normalitetit të Tiranës. A mundet të na imponohet të gjithëve një turmë, e cila pasi ka ardhur me muaj të tërë vërdallë nëpër Tiranë, duke xhiruar përnatë rrugët e qendrës me britma dhe të shara dhe duke shqetësuar njerëzit e ulur nëpër kafe, brenda nëpër dyqane, restorante ose lart nëpër shtëpi, apo duke u jashtënxjerrë në kryqëzime për të bllokuar trafikun, duke bullizuar e goditur drejtues automjetesh të penguar në rrugën e tyre, pa pyetur fare për lirinë dhe për të drejtat e askujt tjetër, shpërthen në një furi dhune, me gurë e me zjarr kundër qytetit, kundër institucioneve, kundër dyqaneve, kundër policisë së shtetit? Kush janë këta dhe në emër të kujt duan t'i imponojnë shoqërisë sonë, kryeqytetit tonë, vendit tonë, shembullin e forcës së verbër të anti-ligjit dhe anti-njerëzillëkut?”, tha Rama./Dosja.al