Berisha: Do të ngremë një agjenci kombëtare që do të merret me pronat e krimit dhe pronat e paligjshme të politikan&e...
Aktualitet
Ndoqi rivalin në mes të rrugës duke qëlluar me armë/ I riu shqiptar dënohet me 15 vite burg në Angli, dalin pamjet e rënda të sulmit
Mediat britanike shkruajnë se Mateos Jubani, i cili në kohën e arrestimit ishte 30 vjeç, u prangos më 9 korrik 2025.
13 November 2026, 14:08Nga E.d
Mateos Jubani
ANGLI- Një shqiptar është dënuar me 15 vite burg në Angli, pasi u përfshi në dy sulme të rënda me armë zjarri në zonën e Enfield, në veri të Londrës. Ai është Mateos Jubani, i cili u dënua pas ngjarjeve të ndodhura në qershor të vitit 2025. Policia Metropolitane e Londrës ka publikuar edhe pamjet e kamerave të sigurisë, ku dokumentohen momentet e sulmeve. Në video shfaqet një person që ndjek një të ri në rrugë dhe qëllon me armë zjarri në drejtim të tij.
Ngjarja e parë ndodhi në mbrëmjen e 12 qershorit 2025. Sipas policisë britanike, një person i armatosur ndoqi një 18-vjeçar në këmbë dhe hapi zjarr ndaj tij. Fatmirësisht, plumbi nuk e kapi të riun, i cili arriti t'i shpëtonte sulmit. Por vetëm rreth 30 minuta më vonë, situata u përshkallëzua sërish. Rreth orës 23:00, një 32-vjeçar ndodhej brenda makinës së tij në Park Avenue, pranë kryqëzimit me Green Lanes, kur një person i armatosur qëlloi në drejtim të automjetit.
Edhe këtë herë plumbi nuk e goditi drejtuesin e makinës, por ngjarja mori një tjetër kthesë vetëm pak sekonda më vonë. Një person tjetër iu afrua automjetit dhe e goditi 32-vjeçarin me thikë përmes derës së makinës. Si pasojë e sulmit, viktima mori plagë të rënda në shpinë dhe u dërgua me urgjencë në spital, në gjendje të rrezikshme për jetën. Për disa kohë gjendja e tij ishte kritike, ndërsa më vonë policia britanike konfirmoi se ai kishte arritur të shërohej plotësisht.
Mediat britanike shkruajnë se Mateos Jubani, i cili në kohën e arrestimit ishte 30 vjeç, u prangos më 9 korrik 2025. Një ditë më vonë, ai u përball me disa akuza të rënda, mes tyre dy akuza për tentativë vrasjeje, armëmbajtje me qëllim rrezikimin e jetës dhe akuza të tjera që lidhen me posedimin e pasurisë kriminale.
Çështja e tij përfundoi në Gjykatën e Kurorës në Wood Green, ku seanca për dhënien e dënimit ishte caktuar më 10 nëntor 2026, përpara gjyqtarit John Dodd KC. Në përfundim, shqiptari u dënua me 15 vite burg. Dënimi u bë publik edhe përmes pamjeve të publikuara nga Policia Metropolitane, ku shfaqet fotografia e Jubanit dhe njoftimi për vendimin e gjykatës.
Ajo që e bën edhe më të rëndë këtë ngjarje janë pamjet filmike të publikuara nga autoritetet britanike. Kamerat e sigurisë kanë regjistruar lëvizjet e personit të armatosur në rrugët e zonës së Enfield, si dhe momentet që lidhen me sulmin e dytë ndaj 32-vjeçarit. Në videon e publikuar shfaqen pamje nga nata e ngjarjes, ndërsa policia ka bërë të ditur edhe dënimin e dhënë ndaj Mateos Jubanit.
Autoritetet britanike kishin bërë më herët apel për ndihmën e qytetarëve në lidhje me hetimet, pasi dyshohej se në sulme ishin përfshirë disa persona. Policia kishte bërë dallimin mes personit që qëlloi me armë zjarri dhe personit që kreu sulmin me thikë. Megjithatë, deri më tani nuk janë bërë publike të gjitha detajet e vendimit përfundimtar, përfshirë listën e plotë të veprave penale për të cilat Jubani është shpallur fajtor dhe nëse persona të tjerë të përfshirë në këto ngjarje kanë marrë dënime./Dosja.al